السبت، 14 مايو 2011

المهر






    
     


                                    بينى وبينِك ... كان فيه بحر !


                                 وانا معرفش اروح  _ غير ليكى


                                  وانا معرفش اموت _ غير فيكى


                                 وانا مش (موسى) ....ولا فرعون !


                                                ولا بحار


                                          ولا صاحب (فُـلك)


                                       ولاشيطان يقدر ع السحر


                                               انا انسان


                                              المفروض !


                                             ان انا غلبان


                                            مولود غلبان !


                                      طارح من طينة ارضِك


                                     غصنِك ـ ضلك ـ عرضك


                                   اللى استعصى على (الكُهان)


                                                ............


                                             من يوم ما وعيت


                                        اسمع عنك بس  حديت


                                            من يوم ما وعيت


                                 يقولولى   حاجات ولا ف الحواديت


                                 فيه ناس بيقولو انك جدة لبلاد الارض


                              فيه ناس بيقولو انك  شابة ...... شيبها الحزن


                             فيه ناس بيقولو انك (ملكة) .... مسلوبت عرش


                                   عشقوكى ملوك بطول والعرض


                                  وخانوكى ملوك بطول والعرض


                                 الدنيا بحالها بتتحاكة بالخير والشر


                               الدنيا بحالها بتتحاكة ومش عارفة السر !


                                            وتعدى الايام وتمر 


                                       وانا لسة فى ضل الاشواق


                              على شطك واقف ـ مستنى ـ تبوحيلى بسر


                                        تحكيلى حكيتك ـ بظبط


                             تقوليلى كل اللى انا عارفه ـ ومش عارفه !


                               كل اللى انا سامعه ـ وفاهمه ـ وحافظو


                                        تحكيلى علشان اصدق


                                          ـ ولو انى مصدق


                                  بلعكس انا يمكن مؤمن بيه اكتر منك




                                 ـ     احكيلى بنفسك ـ من نفسك


                                        لونفسك ..... يطمن قلبى


                                        يعرف انك ليه ـ  وحديه


                                      مهما ان طال اوقصر العمر


                                     مهما ان شاخ فى عنيه الدهر


                          يعرف انه اكيد مـُطر يدفع مهرك .... شلال  ـــ دم




                                                  ...........


                                    يوم ما دخلت  ـ  ميدان تحريرك


                                       يوم ما كتبت بدمى مصيرك


                             يوم ها عرفت ان فى عمرى ما هعشق غيرك


                                          يوم ما قطعت حبال الصبر


                                      ودبحت الخوف ( وتويتو) فى قبر


                                         بينى وبينك كان فيه ـ جسر


                                        وبينى وبين الموت كان  شبر


                         ـ قرب منى ـ اتبسم لى ـ خدنى فى حضنه وقال ـ معلش


                                                   كان خجلان


                                         ـ حط عنيه منك فى الارض !


                                                  ..............


                                          يوم ما عرفت طريقك فين


                                         يوم ما زحفت وراء الملايين


                         وانا مش خايف ـ ولا قلقان ـ ولا حيران ـ ولا مسكين ـ 


                                        ولا مزروع فى العتمة حزين


                                          يوم ها الصبح فرد جناحته


                                             قبل الليل ما يلم حاجاته


                                         وقبل الشمس ما تملا المطرح


                                           شفت ربيع العمر بيطرح


                                        شفت وشوش الناس ـــ فيضان


                                          بحر بيروى وطن عطشان


          شفتِك جاية ـ ومتحنية ـ و متوضية ـ ومصلية ـ و رافعة رايات النور ـ والنصر


                         



هناك 21 تعليقًا:

حرّة من البلاد..! يقول...

كلمات جميلة أخي
الله يحفظ مصر وأهلها
دمت بخير
تحياتي

شهر زاد يقول...

اقف تقديرا لكلماتك اخي التي ادمعت قلبي قبل عيني
هي ام الدنيا فنستحق كل حب الدنيا
احببتها وانا الغريبة عنها فمابالك بالذي يعيش في احضانها
اللهم اصلح حالها واهدي اهلها ووفق بينهم
تحياتي

hend anwar يقول...

عالقدس رايحين شهداء باملاييييين

Haytham Alsayes يقول...

ياسلام علي كلامك الجميل
مقدرش اضيف اي حاجة

Amira Yusuf يقول...

تحـــــــــــــــفه
تحيا مصر :)

Ramy يقول...

الله

يا عباس كلمات أقل ما يُقال عنها

أنها رائعة

سواح في ملك اللــــــــــــــــــه- يقول...

الله ياعبس
ايوة كدة ارجع لعلع
واكتب لنا ماثوراتك الجميلة
حمد الله علي السلامة ياعبس
تحيتي

عباس ابن فرناس يقول...

حرة من البلاد
ويحفظ الامة كلها باذنه تعالى

اشكرك وكل اهل فلسطين الاعزاء

عباس ابن فرناس يقول...

شهرذاد

لستى غريبة

انتى مننا وعلينا

وربنا يحفظ الامة كلها

تحياتى المستعطرة

عباس ابن فرناس يقول...

sun of free

ربنا بسمع منك

ونول الشرف العظيم

نورتينى

عباس ابن فرناس يقول...

ميرو

الله يجبر بخاطرك

نورتينى

عباس ابن فرناس يقول...

هشام السايس

من بعض ما عندكم يااستاذى

سعيد جدا بالزيارة
تحياتى المستعطرة

عباس ابن فرناس يقول...

رامى

انت الاروع ياصديقى

عباس ابن فرناس يقول...

سواح

اكيد
فضل تشجيعك يامعلم

تحياتى لمستعطرة

Tears يقول...

كلمات دافئة :)

Carmen يقول...

كلمات رائعة راقية ذات معاني هادفة
تقبل خالص احترامي وتقديري

reemaas يقول...

عوزاك تجمع كلماتك دى وتنزلها فى ديوان
بجد تستحق النشر

عباس ابن فرناس يقول...

تريز

اسعدنى الوصف
متشكر

عباس ابن فرناس يقول...

كارمن

نورتينى بزيارة

عباس ابن فرناس يقول...

reemaas

ربنا بجبر بخاطرك

Unknown يقول...

بارك الله فيك أخى الكريم
وفى هذا الرقى الذى امتلك ناصية الكلمة
فطوع حروفها نبضاً ينطق بالحياة

تقديرى واحترامى