الخميس، 2 ديسمبر 2010

فاروق الطيب

                                                 





 
                            رغم الهيبة والشنبات

              رغم شموخك

              كيف النخل

       اللى انت زرعته بكفت ايدك

              فى المتاهات

              انما قلبك

             ابيض " بفته "

              كيف العيل !

          شايل قلبك تحت الباط

         مالى جيوبك بالحكايات !


      ـ تحلف ان " ابوزيد " معرفش !

   يوم ما " خليفه " قتله " دياب "

        وان زمان "المُهرة " البُنى "

         كان بيضفر شعرها " جنى "

          لما نرُد عليها الباب !

                .....

             قواللى ياخال

      لسه بتحكى حكاية " العامر "

     اللى فى مرة " اتلقت " بيتك

       يوم ما اتعارك فى الزلزال

           


       لساك عاشق " عبد الناصر "

      كيف الارض ماتعشق  " ضلك"


          لما يميل ويقول موال



               والله زمان


              يازمان رحال !


                 ......

              قوللى ياخال

               لسه بلدنا

               فيها عيال

              حافضه حكاوى


            " فاروق الطيب "


             ـ عاشقة كلامك


             ـ عاشقة غُناك


             ـ حلمه معاك

              عرفو ياخال ؟


       ـ عرفو ازى هيكونو رجال

           
              والله زمان

            يازمان رحال


               ......


       حلوه ايامك ياابو الطيب


            حلو السهر


          ابو ليل حواديت


            حلو الشاى


          على نار الغيط


           واللى بيحلا


               احلى


              واحلى




             طعم الضحكة


             قلب الواحد


             كان يتنطط


              
             بيه تنطيط !



             تب على فكرة


            انا فى حياتى


            عمرى ما شفتك


             مرة بكيت !


             كنت ساعات


       تلضم يوم واتنين ف سكات


         ولما تخاف الهم يبات


        " تزروق " تحت "التوته"


               وتسرح


               تحلم انك


              لازم تفرح

              يطرح حلمك



              يرجع قلبك

              اخضر تانى


             كما البستان !


         راضى وخالى من الاحزان


                 .....


                كنت زمان !


                لما بتحكى


                توهب لينا


                سيف وحصان


          نصبح جوى اليل فرسان


            كنت بتوهب لينا


                حاجات


               وحاجات




             ساعت البدر


            ما ينزل يلعب


              فوق الحِجر


             قبل ما يعرف


          ان " فاروق الطيب "


                مات !!!




العامر = تعرف فى التراث الشعبى بانها نوع من انواع الملائكة تسكن المنازل والبيوت لحمايتهامن الشياطين


بفته = نبات السمسم حينما يكون ناصع البياض




                                               

هناك 22 تعليقًا:

Dr/ walaa salah يقول...

بصراحه جميل اوي يا عباس

ممكن اقول على اللي انت كتبته ده يندرج تحت مسمى موال صح؟


بس سؤال لو سمحت

مين فاروق الطيب ده ^-^

عباس ابن فرناس يقول...

فاروق الطيب
مش عارف !
عايز اقول حاجات كتير عنه
عايز اقول انه كان ابوى
اخوى
صاحبى
استاذى اللى علمنى كتير
كان فيلسوف وحكيم برغم من انه كان امى يجهل القراء
والكتابه
كان على الفطره البسيطه لكن كان ليه رواىا فى الحياء
كان شجاع لايخشى فى الحق لومة لائم
اول واحد عرفنى بفطرته البسيطه يعنى ايه فن ويعنى ايه شعر وخيال وامل واحلام وطموح ومبادى ورجوله وشاعة وكرامه واخلاق وعفو ورحمه انسانيه سماحه زهد قناعة يااااااه حاجات كتير خالص
اسطورة محدش كتير اكتشفها
جه الدنيا غريب ومشى منها غريب من غير ماحد يحس بيه
يمكن انا نشرت كلامى عنه علشان كدا
بس للاسف عمر ماحد هيحس بيه زيي
نفسى يكون عارف انى حبيته اكتر من اى حد

Dr/ walaa salah يقول...

كان لازم ارجع بعد ردك

واضح حبك ليه يا عباس عشان كده انا سألت عنه

الله يرحمه

ツSmiLeY AnGeLツ يقول...

السلام عليكم
الله عليك يااخ عباس
كلمات جميلة جدا
مش عارفة ليه كل مااقراءه خواطرك
يدندن ليها في عقلي لحن مع قرائتي لكلماتك
تقبل مروري
سلامي ليك اخي.

شهر زاد يقول...

اخي عباس
تعرف غير جمال الكلمات وروعة الزحل الي خطتو ااناملك وعبر عنو قلبك في حاجه مهمة شدتني للموضوع
هي وفائك لذكرى الراجل الي من خلال ردك على د.ولاء
حسيت ان قدوتك في الحياة وان مثلك الاعلى
جميل ان يتمسك الانسان بذكرى شخص يرجع اليها كلما احتاج اليها
لكن تأكد اذا كان الرجل الذي تحكي عنه بهذه العظمة الي وصفتها فأكيد انك مش حتكون الوحيد الي بيحافظ على ذكراه
تحياتي لك رغم عتابي البسيط على غيابك على المدونة بتاعتي

Unknown يقول...

كلامك أغنيه و أغنيه جميله كمان كله احساس و صدق و كلماتك وقعها جديد عليه فيها حزن و فرحه في وقت واحد...أشكرك على وفاءك و مشاعرك الجميله
تحياتي الخالصه لك

سواح في ملك اللــــــــــــــــــه- يقول...

ايه ياعبس الحلاوة دي
بجد ياعباس والله كلامك موزون
وزي السكر
عبد الرحمن الابنودي بتاع المدونات
تحياتي ليك

Carmen يقول...

جميلة جدا بجد تسلم ايدك
بيعجبني اوي تنسيقك الرائع ده
تحياتي

sal يقول...

روعة يا عبس

الله

.................
واللى بيحلا


احلا


واحلا




طعم الضحكة


قلب الواحد


كان يتنطط



بيه تنطيط !
...........

كمل يا عبس وما تستعجلش
وانت حتقول كلام رااااائع

اتمنى لك التوفيق

تحياتى وتقديرى

سندباد يقول...

بتبهرني ياصديقي بساطة كلماتك وعفويتها بجد ببقي سعيد اني باجي هنا واذا كان فاروق الطيب فيلسوف وحكيم فقد اخذت منه الفلسفة والحكمة
دمت بمدعا ياصديقي ودامت وسلمت بنات افكارك
تحياتي الخالصة

الغاردينيا يقول...

مرحبا عباس وجمعتك مباركه

طبعا انا على قدي في اللهجه المصريه فلما اقرا شئ

شعبي ممكن مفهموش بشكل كلي بس اقدر اقول اني استمتعت

بماقرأت حتى لومافهمت ساعات الاحساس الجميل اللى بتوصله

الكلمات بيكون كافي ومغني عن اى فهم ..

وفاروق الطيب لو طلع من الدنيا من غير محد يحس بيه

انت اعطتنا فرصه اليوم نحس بيه :)

ضلك يكتب هكذا ظلك

احلا واحلا تكتب هكذا احلى واحلى

و كمان تسراح تكتب تسرح

وبكايت ... بكيت

ولو كان فاروق دا توله الله برحمته كماوصلت لنا كلامتك
فالله يرحمه ويغفر ذنوبه ويوسع له في قبره
اعطر تحياتي لاخي

فاروق سحير ( فاروق بن النيل ) يقول...

عباس ...........
الله كلامك جميل أوى كأنك بتحكى عن أبو زيد الهلالى سلامة
ومواويل جميلة بتفكرنا بأيام زمان
واضح حبك للراحل" فاروق الطيب "
ياريتنى مكانه لأحظى بهذا الحب وحتى أكون طيبا مثله

هبة فاروق يقول...

اية المواهب دى كلها والله انت مش اقل من الابنودى
كلماتك فيها تصوير وخيال يعنى سرحت مع جملة
ان زمان المهرة البنى كان بيضفر شعرها جنى اية الخيال
والتصوير الرائع دة بجد انا سعيدة انى اتعرفت على
مدونتك فى انتظار جديدك يا فنان
وطبعا تحية لروح استاذك فاروق الطيب

اقدم عاصمه فى الحب يقول...

السلام عليكم

ترتيب جميل وسرد اجمل لحكايه راجل فعلا يجب ان نذكره
سمعت عنه قليل ولكن اجمل الكلام واجمل الصفات فى كل مره يذكر اسمه قدامى
.
سعدت بالمرور جدا
.
ودى وإحترامى :)

reemaas يقول...

فعلا امتداد للابنودى فكرتنى بيه بجد وحلو انك ترجمت هههههههه حرمت من المرة اللى فاتت

ليلى الصباحى.. lolocat يقول...

السلام عليكم ورحمة الله

اولا اخى الكريم اقدم اعتذارى لانى تأخرت فى قراءة كلماتك الجميلة

عايزة اقولك شىء

طبعا بعيدا عن الله وجميل ورائع و جامد ومبهر وكل الكلام ده

اقولك شىء مهم جدا

احنا فى بلدنا قليلين اوى اوى اللى بيقدروا على النوع ده من القصائد امثال صلاح جاهين والابنودى و جمال بخيت والجديد (هشام الجخ )
http://www.youtube.com/watch?v=TnzRQm4hx3o&feature=related

سؤالى الان ياترى انت اتخذت قرار جاد علشان تحافظ على موهبتك دى غير انك تكتب فى موقعك هنا

المدونة فى اى لحظة ممكن تتحذف او يحصل شىء فيها يعنى مش هى الحصن الكافى لاعمالك
والنوع ده من الاشعار بيصبح تراث بعد زمن

اخى لازم تحافظ على كلماتك من خلال ديوان شعرى

حقيقى انت موهوب وكلماتك عميقة جدا وعلى فكرة برده انا احساسك وصلنى و حبك لفاروق الطيب شعرت به جيدا

رائع اخى واعتذر لطول كلامى
دمت بخير

عمرو وجيه يقول...

ra2e3 eslobak

2awel zeara le modawentak


she3r momtazsalom qalomak

افروديت يقول...

جميل أوي كلامك والأجمل أن في عندك وفاء شديد لأنسان ربنايرحمه ......

ولكني أحتج علي كلمتك " عاش ومات ومحدش حس بيه"

أناشايفه أنه تركلك ثروه كبيره هي أنه علمك الشعرولو أن ده أحساس محدش ينفع يعلمه لحد أنت موهوب بالفطرة وهو ثقلك موهبتك وساعدك في أظهارها

عباس ابن فرناس يقول...

اعتزر عن عدم الرد التفصيلى على

التعليقات فى هذا البوست

تقديرى

وحبى

واحترامى

بجد انتو اللى بتونسونى

Haytham Alsayes يقول...

الله يابيبس جامدة جدا
ماشاء الله اسلوبك في الشعر العامي رائع


تحياتي ليك

حرّة من البلاد..! يقول...

أخي عباس
أنت قلبك أبيض وطيب
كل الناس الي ذكرتهم اصبحوا ذكريات
مجرد حكايات ننعش فيها ضميرنا
الي من زمن مات
والله كلماتك خرقت فؤادي
شكرا لهذا الابداع الأصيل
تحياتي

راء يقول...

بسم الله ماشاء الله

انا مش عارفة مبهورة بيك اوي
الشخصية اللي انت حكيت عنها..فاروق الطيب
فكرتني بشخصية قريبة مني اوي ماتت كمان بس هيا اللي علمتني كل حاجة من حكاياتها..هيا اللي حببتني في الدنيا بشكل ما واما ماتت الدنيا موقفتش بس كفايا انها حفرت نفسها حوايا زي ما عم فاروق عمل معاك كده

ربنا يرحمهم جميعا

وكلامك رائع جدا على فكرة فكرني بهشام الجخ :)

استمر للامام دايمااااااا