فنان انا والله
وفنى خطير !
من غير جناحات
بحلم وبطير
لفيت الدنيا
عشقت كتير
صاحبت الناس
غنى وفقير
وغويتى الحب
وفعل الخير
وغويتى ابيع
للناس طراطير
طراطير
طراطير
طراطير
طراطير
يا ولاد يا بنات
بصو يا قمامير
فى عنيى الدنيا
نسيم وعبير
وفى قلبى تلاقو
حرير فى حرير
وتلاقو بلاد
كان ليها امجاد
بس الاسياد
زرعوها فساد
طرحت يا ولاد
هم واحزان
وانا مهما ان كان
قلبى الهيمان
رغم الحرمان
فى ليل ونهار
واقف زنهار
بين جنة ونار
ولجل المقدير
لسانى بغير
و لجلك يا بلاد
طراطير
طراطير
طراطير
طراطير
و مناخير السبع
سبع مناخير !
يحكم فى الناس
والحكم يصير
مع انه عجوز
خرفان وحقير !
وفى الغابة غلابة
وشعب اسير
على باب الموت
واقف طوابير !
طراطير
طراطير
طراطير
طراطير
يا نظام ياهُمام
ياعظيم
يا كبير
يا ابو شنة ورنة
ونار وسعير
يا مكدر شعبك
احسن تكدير
كان فين جبروتك
ساعة التفجير !
كان فين جبروتك
ساعة التفجير !
طراطير
طراطير
طراطير
طراطير
كل سنة ونتو طيبين يا اخوانى الاعزاء
انتو وبس
والوحشين لا
وعقبال ما الرياض تستقبلك انتا كمان يا اللى فى باللى
وحشتونى بجد
تحياتى المستعطره
هناك 18 تعليقًا:
حمدالله على السلانه اخى على
اتمنى ان يكون الوالد بخير
وكتاب الله كنت فى بالى النهارده
وقولت عبس طول اووووووووى ولولا انشغالى بامتحانات محمد
وعدم دخولى كتير وتحضيرى للسفر كنت دخلت سألت
طمنى على الوالد يارب دايما بخير
وتلاقو بلاد
كان ليها امجاد
بس الاسياد
زرعوها فساد
طرحت يا ولاد
هم واحزان
طبعا راجع بحاجه جامده وفى قلب الحدث
عندك حق اللى كان فى اعلى مكان فر زى الفار
يادى العار
يسلم نبض قلمك
مرة تانيه الف حمدالله على السلامه
تحياتى
السلام عليكم
الحمد لله اخى على سلامتك
يارب يكون الوالد بخير ان شاء الله
اما بقى موضوع الطراطير
يارب يستجيب لك اخى بس ما يلاقى مكان يستقبلة
علشان يكون عبرة لكل ظالم طاغى
كلماتك جميلة كتير
مش عارفة ليه فكرتنى بسيد مكاوى فى المسحراى ههههههه
جزاك الله خيرا اخى
تحياتى لك وتقديرى
الله جميله اوى بجد ..ومعناها جميل اوى ..
اللهم امين يارب عقبال ما الرياض تستقبل اللى فى بالنا كلنا ...
تحياتى
جميلة أخي القصيدة
ويعجبني اسلوبك الرائع
ان شاء الله ربنا يستجيب لك
مهي اصبحت الرياض مكب للطواغي والمجرمين
تحياتي لك
ولدى وصديقى بياع المزامير أبو الطراطير عباس الصغير
كيف حال الوالد لعله بخير ندعوا الله له بالشفاء
حمد الله على السلامة ياواد ياواد ياشقى ......
إيه الحلاوة دى :
فكرتنى بالمولد وبالليلة الكبيرة والحنين
أصل زوارك على بالهم همه موش واخدين
من الفلكلورالرائع بتقوله وموش حاسين
لأنهم يمكن موش عاشوه زينا وإحنا صغيرين
لأن إحنا بنتفرج على ناس بسطاء فلاحين
ولا يمكن همه من الهم صبحوا ناس ناسيين
وكتر المشاكلل عليهم خلاهم موش فاكرين
أو الدنيا خادتهم وراحوا فيها تايهين
والله كلماتك رائعة سلم قلمك ووحشتى ياشاعر العامية الفلكلورى الأصيل
عود احمد
حمدا لله على السلامه وعودة الكلام الجميل
واللي في بالك ممكن مايلحقش الرياض ولا جده
أصل الاعمار بيد الخالق
والله وحشتنا كتاباتك حمدالله ع سلامتك
عودة قوية من جديد
تسلم ايدك
تحياتي لك
حمدا لله على سلامتك
اتمنى من كل قلبي ان تكون امورك على احسن حال وان يكون الوالد قد تعافى
كلمات ثائرة تلامس السماء من قوتها
امتعتنا بعد هذه الغيبة الطويلة
تحياتي
يااااااه حمد الله ع السلامة يا عم
(:
أخبار الوالد ايه يا رب يكون احسن دلوقت
وحشتنا بجد
ايه يا عم الجمال ده طراطير طراطير (:
و انت طيب و اللى بالك و بالى لأ (:
متغبش يا عم كدة
تحياتى
روعة يا عبس
وحشتنا
كل سنة وانت طيب
ذبت في عذوبه الحرف
حلووووووووه بجد ... وآمين عالدعوه ههههه
انا كمان لسه داخله اليوم من بعد غياب :)
بالنسبه لموضعنا والله العظيم مقدرت اطلع الفايرس
ومش عارفه كمان الملف راح فين فرحت جبت لك الروابط
دي اي نعم انا شايفه تحسن كبيررر عندك بس برضه مش
بحب تظن اني نسيت الموضوع او مش بوفي بوعدي واعذريني
بكل حااااال :)
http://www.3asfh.net/vb/t31600.html
http://www.rasgharib.net/vb/showthread.php?t=4948
بحفظ الله ويارب ينفعوك بجد
بقصد اعذرني ههههه سوري
وحمد لله عل سلامه ,
ياه كلمات رائعة بسيطة تدخل القلب من اوسع ابوابه ، كلمات تحمل الكثير من الهم والحزن معبقة بكثير من الالوان ..
يسعدني المرور لاول مرة بمدونتك وان شاء الله مش الاخيرة
تقبل مروري ..
موهبة لاشك كبيرة تستحق الاحترام والتقدير
تذكرنا بزمان العمالقة.....
وحمداً لله على عودتك ونتمنى أن يكون الوالد بخير وأن يكون أفضل بإذن الله
موهوب ومبدع دائما
بجد تحفة واكثر من رائعة الله عليك يا عباس
يسلم قلمك وافكارك
احنا لابسين الطارطور التاريخي
اخوانى الاعزاء
جايدة العزيزى
ام هريرة
بنوتة مصرية
حرة من البلادة
عم فاروق
لورنس
كارمن
شهرزاد
رامى
سال
الغاردينيا
وجع البنفسج
مجمد الجرايحى
هبة فاروق
تريز
وحشتونى بجد ووحشنى الرغى معاكم وعندكم
الفضول هيموتنى ونفسى اتابع كتاباتكم
بس قريب انشاالله ارجع اتابع معاكم
والدى العزيز فى تحسن مستمر بفضل دعاكم
متشكر على السوال
متشكر ليكم كلكم
وعايز اقوللكم
انى بحبكم
وبعزكم جميعا
لانى انا .....
بتونس بيكم
تحياتى المستعطرة
جميييييييييييلل جدا يا عبس
إرسال تعليق